Alos güenus días!! Pos velaí, esti Día delas Letras Estremeñas que vos cuentávamus la semana passá ya no son figuracionis, ya es ralidá. Ya es ralidá un día nel que amus recordau a tolas pessonas que escrevin i escrevierun las lenguas que sientin enas sus casas, a sus mairis i alos sus agüelus.
I mos alegra abondu el avé-lu hechu. Primeramenti, porque endedicandu-si-lu a Elisa esti Día delas Letras Estremeñas va a tenel, dendi lo primeritu, comu en Galicia con Rosalía, nombri de mugel.
I, de contau, por estal en Ceclavín, el puebru que vidu la nacencia d’Elisa, i ena que ceclavinerus i ceclavineras, siguin a mantenel viva la concencia del su patrimoniu lengüísticu.
I estu no es palral escusau, porque na menus que 60 zagalis i zagalas s’an arrochau a partecipal en el Concussu Literariu que amus entangau junta’l Conceju de Ceclavín. Na menus que 60 zagalis i zagalas s’an arrochau a partecipal pusiendu en papel el estremeñu que sientin enas callis i vereas de Ceclavín, assinque pa arrematal yo vos quieru leyel una delas poemas ganaoras, esta velaquí de Carla Gregorio:
Si huesi posibli hadel crecel la yerba nel mi cuartu,
canteal el baldosín paque salga la hesa
i que la bordisca rompa la afechaúra.
Si huesi possibli lleval la belsana al mi balcón,
que la ñebla entri pola puerta
i el tu cheru porcima del coraçón.
Si huesi possibli trael el ríu ala mi bañera,
dexal que l’airi trastolei entri las peñas
i busqui los rasponis delos nutrius.
Si huesi possibli hazel una barca cona mi mesa,
dexal que l’agua arrepetri sobri la pesquera,
abril una hienda i dil-mi al mar.
Música que acompaña el Poema es de ACETRE... del disco 'Aires de Redoble'...
