Los viernis, nesti arradiu, palramus un poquinu n'estremeñu... oi con Ismael Carmona, sociu hundaol del OSCEC... primer presidenti... escreviol dela Ortografía del Estremeñu i prohessol d'Estitutu
El OSCEC nació nuna juntança de escrivientis, filólogus, palrantis i defensoris del estremeñu ena ciá de Caçris cona idea de assentar una koiné estremeña i assina ahinchonar el usu del estremeñu largu d'interessis particularis i políticus i siempri sin ánimu de lucru.
Alo primeru no tós huerun gustosus de tener una variedá común ena escritura i ena oralidá, peru cumu d'otra manera no poía pular el idioma s'aterminó por establecer una Comissión de Lengua que aviara tolos espeutus tocantis al estremeñu (ortografía unificá con recoja de variedás dialectalis), dicionariu i gramática. A esta Comissión, por causa dela promovición dela propia associación, le siguierun otras comissionis cumu la de Coltura, la de Literatura, etc., formi se diva ajuntandu la genti.
Los primerus añus huerun durus porque suponía juntanças mensualis en Caçris delas Comissionis pa dir entangandu la ortografía sostribá en decisionis palramentás i votás arregru alos criterius lingüísticus i istóricus dela lengua, tó essu sin tener local propiu, ni pagamientu del porti delos comissionaus, ni faciliá nenguna.
Aprovechandu fiestas i otrus encuentrus colturalis, el OSCEC diva a dar chalras divulgativas en Estremeñu por tolos puebrus d'Estremaúra que quijieran, sin más motivación que la de palrar en estremeñu i hazer sentir ala genti que'l estremeñu es una lengua más i que sigui viva.
La fuga delas palramentas hue el encuentru en Malpartía de Prasencia ondi las torías universitarias se vierun farrungás polos testimonius del OSCEC i otras associacionis colturalis dela Serraílla i dela propia Malpartía, dandu a entender que dendi la Nuversidá ná hazin pa proteger i ahinchonar las lenguas amenuías d'Estremaúra.
Tamién estuvu a palrar el presidenti por antoncis alos representantis políticus estremeñu ena Assambrea d'Estremaúra paque hizieran qué pol estremeñu, el portugués rayanu i la fala, queandu aquella defensa pa simienti de rábanus. Cola redación dela Ortografía del Estremeñu sostribá enas decisionis dela Comissión de Lengua hecha, editá i pubricá del anterior presidenti, el estremeñu púu por fin a ser puestu por escritu sin mieu a marrus i con una referencia seria.
Cola muança de mentaliá i de proponimientus dela associación que s'assentavan ena concenciación, estudiu i esparramamientu del estremeñu i la su coltura, la diretiva hue muandu, assina cumu la horma de enfuncionar, en dos etapas mu destintas i las que faltarán por venir.
