Palramus un poquinu en Estremeñu, ya sabin, tós los viernis n'esta arradiu... Oi con Maria Rubio Cerro, biembru de OSCEC... a los güenus días...
Alos güenus días, Diana! Oi vos queremus cuental lo que mos passó el sábau acaberu a Valencia. La d’Alcántara, craru, ala otra en Estremaúra le dizimus Valencia del Cid. Endispués dela nuestra chalra, Mercedes, una vezina de Valencia, mos truxu una caxina que estava a guardal dendi ai 30 añus, asperandu el día que conociera a quién confiá-la, quien puyera hazel algu aparenti con ella.
Mos cuentó lo contenta que estava d’avel-mus conocíu i de sabel que palrandu assina no es palral mal castillanu. Mos cuentó tamién el mieu que tenía que los sus nietus hondearan un día la caxa al no sabel ya ni lo que era.
En esta caxina están tolas palabras en estremeñu que el su ermanu hue sintiendu i recadandu en Valencia i mos las queó toas en horma de fichinas endividualis.
Assinque quandu prencipiemus esti proyetu que estamus desenroandu por mé dela Deputación de Caçris i le pussimus essi títulu de “Recuperando el Patrimonio Lingüístico de Extremadura”, no mos poíamus figural que diva a tomal tol sentíu, i que se diva a hazel ralidá tal qual.
Pocas cosas más polías que el vel cómu los estremeñus i las estremeñas están a perdel la vergüença i están a arrecuperal la su dinidá lengüística. Agralecíus, Mercedes! Agralecíus, Diana!
