Los viernis palramus en estremeñu. Oi con Juan Franciscu Reina, biembru del OSCEC, Órganu de Siguimientu i Cordinación del Estremeñu i la su Coltura.
El OSCEC es una associación fundá nel 2011 con el afán de servil d’encontraeru palos estudiosus, escrevioris i amantis dela coltura i la lengua estremeñas. El Órganu tien por finis estudial i reglamental la lengua estremeña, assín comu trebajal por esparramá-la, acrecel el usu della i atorgá-lli caraiti estitucional.
Tamién precuramus una presencia mayol dela dentiá estremeña nel espaciu púbricu dela nuestra Comunidá, palo qual entablamus amistá con pressonas i associacionis colturalis de tol territoriu que vestiguin i defiendan el patrimoñu palrau, musical, gastronómicu, arquitectónicu i otrus saberis i pláticas tradicionalis.
Pa hazel llegal al púbricu el nuestru proyetu, damus chalras duranti tol añu por tol territoriu estremeñu.
Si quieris participal ena Renacencia dela nuestra coltura i la nuestra lengua manda-mus un messagi p’apreparal un actu ena tu localidá. Tenemus abondu de que palral, escrivi-mus a oscecestremaura@gmail.com
