Los viernis, n'esti arradiu palramus un poquinu en Estremeñu. Oi con nuestru collaçu Juan Pedru Sanchez, periodista i presentaol de Canal Extremadura Televisión i biembru de OSCEC. A los güenus días prenda...
Alos güenus días, Diana, saluínus palos collaçus mas mairugaoris del arradiu n'Estremaúra.
El sábau passau, biembrus del Órganu OSCEC, estuvimus a Torrojoncillu, puebru artesanu ondi los aiga, palrandu o, comu izin ellus, charriandu a tentu de cómu condural i afial la palra pringona, que es comu la mientan los sus vizinus. I, velaí, i tantu que mos rehundió apartijandu angunas ideas, eniciativas i proyeutus que bemus entangau enos tiempus acaberus.
Ergullosus ellus d'esti patrimoñu lengüísticu, tantu dendi el Conceju comu dendi los coletivus colturalis del puebru quierin que las sus palabras, espressionis i verbus, o sus fechis vocálicus, acontinin huendu parti emportanti de su día i passi a gastal-si enos espacius púbricus. Enas callis, enas praças, enos comercius, enas juntanças i corrobras entri unus i sotrus. I que sea tamién una horma de apopal la coltura artesana i el bureu en Torrojoncillu.
El primel puebru hué Benquerencia, endispués La Cosera i ara Torrojoncillu.
Ya tenemus ena mesma riestra a otrus asperandu p'arrayal los mesmus proponimientos comu Valencia d'Alcántara o La Garrobilla que quierin tamién emprencipial a hazel lo mesmu. Miral al huturu tuviendu al estremeñu vivu i presenteru.
