Los viernis n'esta arradiu palramus un poquinu en Estremeñu... oi con Carlos del Sol, profesol i biembru del OSCEC a tentu’l podenciamientu dela Semana d’Estremaúra ena Escuela
L’ESTREMEÑU ENA ESCUELA
Mesmu ayel arrematemus un cussu de hormación del prohessorau, entangau pol Centru de Prohessoris i Recussus de Badajós, a tentu’l podenciamientu dela Semana d’Estremaúra ena Escuela, con güena presencia i tentigués quanti ala afrujencia de partecipantis. Essa Semana d’Estremaúra ena Escuela que se quiel ugañu endonal i atalantal assín, comu Semana, velaí que, dendi hazi añus á, queó enchicá i amenorá a namás un Día d’Estremaúra (el del cabu d’añu del Estatutu d’Autonomía).
I palrandu sobri las esperencias proprias, arreparemus en que enas nuestras escuelas s’an diu atranquijandu liqueamenti los feitíus colturalis (descantis i bailaus, cozina i condumius, tragis i aderezus…), peru mu poquininu los lengüísticus, hueraparti las acostumbrás leturas delas poesías del Chamiçu i el Graviel i Galán, tan lindas... comu trillás.
I velequí que aterminemus dil hiziendu un eshuerçu pa canteal la mirá ala reconocencia i el estudiamientu del nuestru palral enas escuelas dela Estremaúra, assostribandu esti andil ena normación dela lengua estremeña comu passu pleminal pala su enseñancia i deprendimientu, alo primeru en atividais hormativas no reglás, peru alogu, pui por qué no, enos pranis d’estudius autonómicus, desenroandu lo que izi el mesmu Estatutu d’Autonomía d’Estremaúra nel su articulu 7.2, que enfirma assina:
Los poderes públicos regionales […] fomentarán los valores de los extremeños y el afianzamiento de su identidad a través de la investigación, desarrollo y difusión de los rasgos sociales, históricos, lingüísticos y culturales de Extremadura en toda su variedad y extensión […].
