Nesti arradiu, ya sabin, los viernis palramus un poquinu en Estremeñu... Oi con Carlos del Sol, biembru de OSCEC i profesol, a tentu del Día delas Letras d'Estremaúra
…QUE QUANTIS QUE LLEGAN
ESTUS EMPRENCIPIUS
DELA PRIMAVERA…
Truxiendu con estus vessus l’acordança del nuestru grandi Gravielinu, nombrau José Mª Gabriel y Galán, que dendi las huentis del Alavón vinu a hincal la su vida i la su huéyebra enas Tierras de Granaílla, que hue l’encetaol delas letras moernas en estremeñu, que entavía ugañu tenemus enas nuestras copras i enos nuestrus descantis, dendi esta segunda primavera robá, quixiera hazel oi velequí un hurreu rehuerti paque, quantis que lleguin essus acabijus dela primavera, quantis que arrayin essus emprencipius del branu, tuviendu la recordaera dela su nacencia – i no dela su muerti, comu hazin algotrus pal Dia de Reyis-, poamus assiental el día 28 de juniu comu el Día delas Letras Estremeñas, por mó de bel síu esti día que vidu la lus el primel poeta que s’arriscó a escrevil ena lengua del puebru, que s’arrochó a apregonal en estremeñu. Velequí el mi proponimientu: pol Gravielinu, bien puyera sel el 28 de juniu el Día delas Letras Estremeñas.
