Gastemus l'Estremeñu
Viernes, 22 Enero 2021

Los viernis... ya sabin... palramus en Estremeñu... oi con Crus Dias Marcu, biembru del OSCEC, poeta i escriviol

GASTEMUS L,ESTREMEÑU

Dendi que hui chiquinu é sentíu palral ala mi genti n'estremeñu parabrinas que mentavan sentiris i alborozus, al renti la lumbri, delas eras, quandu el trillaeru, alas mugeris enas resolanas o enos arroyus, lavandu los trastis enas tardis de iviernu, alas corrobras de la mi calli enas nochis del veranu.

I toitu essu me s'á queau drentu, cumu un gavarruñu de raízis que rehilan d,'emocionis i ricuerdus. Los estremeñus tenemus que gastal la nuestra luenga con ergullu i con empeñu porque es el sentil sonoru que quearun en nusotrus los nuestrus pairis i los nuestrus agüelus.

Estremeñus i estremeñas, sentí-vud ergullosus d'esti palral nuestru, porque es el ecu avientau dela nuestra estoria. Gastai-la  sin meiu i con riañus, gastai-la enas casas, enas callis, enas praças, enas escuelas i en toitus los rinconis dela nuestra Estremaúra. 

Sabei siempre que palrandu assina (dizí-lu huerti i de reziu) no es palral mal castillanu, es palral bien estremeñu.