Los viernis, n'esti arradiu palramus un poquinu en Estremeñu... Oi con Crus Dias Marcus, escriviol i biembru del OSCEC que va dal una chalra a estudiantis del colegiu Moctezuma de Caçris a tentu la emportancia d'enseñal el estremeñu a los más chiquinus i chiquinas... i a vel si rehundi esti 'exempru... a los güenus días Crus...
Alos güenus días, Diana. Dendi que venimus lavoreandu pola nuestra lengua, estamus convencius eno precisu de lleval el estremeñu alas escuelas. A tentu d'estu, el colegiu púbricu Moctezuma de Caçris mos á dau un apitiu paque oi viernis, endrentu la semana d'Estremaúra, demus una chalra alos zagalis sobri l'estremeñu. La chalra sedrá a estudiantis de quintu Primaria, en tres corrobras, i consestirá en esprical de horma cenzilla, crara i esparijía, con exemprus de gastu, escritus, retratus i vidius en estremeñu las cosinas mas aparentis i presenteras dela nuestra lengua estremeña. Mu güena el ocurrencia d'esti colegiu de Caçris. Asperemus que rehunda l'exempru i s'esmienci de seguía a esparramal la simienti del estremeñu por tolas las escuelas dela Estremaúra.
