Los viernis n'esti arradiu palramus un poquinu en Estremeñu... oi amus a ascuchal el poema 'Lengua Mairi' del libru 'La Huélliga, Sentiris dela Mi Tierra' del poeta i escriviol Crus Dias Marcus, biembru de OSCEC.
LENGUA MAIRI
Yo tengu una lengua mairi,
lengua de sangri estremeña,
lengua que canta el silenciu
delas vozis de mi tierra
Tengu en el pechu raízis
con cañus de savias nuevas,
surcus de viejas simientis,
frutus d'antiguas cosechas.
Tengu en el alma sentiris
de palabras que me mientan,
nuevus retoñus d'antañu,
ramas duna istoria vieja.
Cantal con tierra ena boca
vessus que nel pechu suenan,
es comu sentil por drentu
cantandu la sangri mesma.
Ai que levantal los gritus
del silenciu d'esta lengua
palrandu reziu pal vientu
los airis d'esta bandera
Ecus duna lengua mairi,
sentiris dela mi Tierra,
vozis dun sueñu cansau,
quexas del'alma estremeña
