Dendi oi, tolos viernis, en Primel Ora, dimus a palral en Estremeñu, ena nuestra lengua. Queremus normal el su gastu comu una lengua más, en esta aldea global ena que vivimus i da-li la emportancia que devía ya de tenel. Amus a escuchal a Daniel Gordo, del OSCEC, el Órganu de Siguimientu i Cordinación del Estremeñu i la su Coltura. I a tentu el gastu del estremeñu... si se mos á olvidau cómu se palra... o si sedría güenu que se deprendiera a escuelas i estitutus, bemus preguntau polas callis
Quandu sentimus palral assina, quiciás que mos entri risa, o vergüença, o quiciás que sintamus cariñu o querencia, porque mos recordamus de cómu palravan nuestras mairis o nuestrus agüelus, peru de contau que sentimus que es una lengua que no pega pa gastal en el arradiu, pa dal las enteracionis o pa palral de cosas emportantis, i que sona a passau, a antigu, a cosa sin huturu.
Por essu es tan emportanti que esté suenandu oi, velaquí, ena Canal Estremaúra. Porque una lengua es presenti si la gastamus i es huturu si no mos abexinamus d’ella.
Lo que queremus por mé d’esti apartiju es dil palrandu dela emportancia que tien comu
patrimoniu coltural, i tamién delas possibiliais que tieni en tolos ambientis socialis, peru, lo más trascendenti de tó, el dil muandu essa concencia pa descubril lo emportanti que es el sabel quién semus i qué pintamus en esta aldea global, comu pessonas, sí, peru tamién comu sociedá estremeña.
Mos vemus i palramus tamién los miércolis ena Corrobra!
