Los viernis, nesti arradiu, palramus un poquinu n'estremeñu. Oi con Carlos del Sol, biembru fundaol del OSCEC, amus a recordal los DIES AÑUS D'ANDIL del Órganu de Siguimientu i Cordinación del Estremeñu i la su Coltura.
Hazi dies añus á que esmençemus el andil. Dies añus dendi que una corrupela de gentis desapartás, que bían estau baqueandu pol estremeñu caúnu pola su cuenta, quixun apellal-si pa hazel juntería i calavoral pa dá-li un vencijón al nuestru cutaínu palral, que diva ahozicau ala su perda.
Hue l’Ismael Carmona que emprencipió esti horeu i mos aconllegó, endilgandu correu p’arriba correu pa embaxu alos unus i alos sotrus i entangandu la primel juntança a Caçris. Alogu vinun algotras caravas, i pa acaberus d’aquel hebreru de 2011 queó entangau el que mentemus comu Órganu de Siguimientu i Cordinación del Estremeñu i la su Coltura (OSCEC).
Al momentu se desenroarun corroblas de trebaju p’apreparal i enhatijal la primel huéyebra, la mas nesseçaria: una norma única pa poel escrevil el estremeñu en tolas sus variantis, arrecadandu la riqueza delos sus sonis antigus, concediendu assín queá-lu condurau enos papelis paque no acontinara aballandu pal espenaeru.
I, endispués d’estus dies añus, poemus aterminal que polo plontu semus mas a palral i dimus tuviendu menus mieu de hazé-lu, raceandu ya caiquandu nel arradiu i ena televisión dela nuestra tierra, mu agralecíus a Canal Extremadura.
I, endispués d’estus dies añus, poemus aponderal que l’estremeñu ahila palantri.