Los viernis palramus un poquinu en Estremeñu, ya sabin. Oi amus escuchal al poeta i escreviol Crus Dias Marcus, que mos recita el poemina 'Dulci Sombra', del su livro, 'La Huélliga: Sentiris dela Mi Tierra'
DULCI SOMBRA
Carantoñas del airi s'ensoman
alas nuvis del mi pensamientu:
son sentiris de sueñus cansaus
que s'ascondin detrás del silenciu
son cosinas que tieni esta tierra
son cosinas que tieni esti cielu
quandu ensoman al renti la tardi
las querencias callás del recuerdu.
Son barruntus de viejus sentiris
que m'avientan los airis del tiempu
i goloriis anitiguus de campus
que me train los cenderus del vientu.
Me se hazi de sombra la nochi,
me se van pagandu los ecus
i una manu de sangri m'atienta
los querelis callaus en el pechu.
Son cosinas que tieni esta tierra,
son cosinas que tieni esti cielu
que m'enllenan de dulcis caricias
esta sombra que tengu padrentru
Música de fondo: Acetre, del disco 'Aires de Redoble'
